Batxilergoaren amaierarekin batera ziklo erabakiorrari esaten diogu agur, non gure ikasleak heldutasunaren bidaiari ekiteko prestatzen hasten diren. Galderaz eta erabaki-hartze handiez betetako une garrantzitsua izan ohi da, hemendik aurrera bere etorkizun profesional edo akademikoaren norabidea zein izango den, esaterako.

Gure ikasle asko ikastolan hazten eta hezten dira, 2 eta 18 urte bitartean, eta, beraz, gure familiaren parte bihurtzen dira. Gure ezaugarri nagusia hurbiltasuna eta arreta pertsonalizatua izanik, haien interesetara, gaitasunetara eta trebetasunetara egokitutako orientazio hurbila eskaintzen diegu. Zalantzarik gabe, bere etorkizun akademiko-profesionala zehaztea da bere erronka handienetako bat, eta baita gurea ere; beraz, ikastolatik gure laguntza eta baliabideak eskaini nahi ditugu erabaki egokienak har ditzaten.

MeOrienta programa

EKINTZA Ikastolan badakigu ikasleen trebetasunak landu eta talentua identifikatzea funtsezkoa dela, eta badakigu Batxilergoan garrantzi berezia hartzen duela. Etengabe lantzen dugu hori, eta, horretarako, 3 tutore ditugu, ikasleen eta haien familien jarraipen estuagoa ahalbidetzen dutena.

Ikasturte berri honetan beste urrats bat eman nahi izan dugu, eta Batxilergoko 1. mailan Zeno Quantum-en MeOrienta programa ezarriko dugu, ikastolako orientazio-zerbitzua sendotzen duen tresna, berrikuntzarekin eta etengabeko hobekuntzarekin dugun konpromisoari erantzunez. Orientazioaren eremuko tresna aurreratu eta disruptibo horri esker, ikasleek erabakiak hartzeko etorkizuneko hipotesiak sor ditzakete algoritmoen, adimen artifizialaren eta analisi deskriptibo eta prediktiboen bidez, besteak beste.

Ikasle bakoitzaren talentuak eta indarguneak detektatzen lagundu nahi dugu, eta etorkizuneko etaparako aukera egokienean orientatu. Ekimen berri honi esker, MeOrientak eskaintzen dizkigun puntako baliabideak erabiliko ditugu, betiere jarraipen oso pertsonalizatua kontuan hartuta. Ikasleak beren erabakietan inplikatuko ditugu, eta irakasleen eta familiaren ikuspuntua integratuko dugu, ikuspegi globala eskaintzeko. Hortaz, orientatzaileek, tutoreek eta familiak egiten duten lanaren tresna osagarria izango da; ikaslearen 360 ikuspegia ematen lagunduko du, izan ere, ikasleak berak ez baitu batzuetan bere indarguneak ikustea lortzen, eta hori berebizikoa da etorkizuna zehazteko.

Nola egingo dugu?

MeOrienta programa Etikako eskoletan aplikatuko dugu, ikastolako hiru tutore inplikatuta, Itziar Urkiri (Batxilergoko arduraduna) orientatzaile gisa, eta Batxilergoko irakasleen lankidetzarekin. Ikasturte hasieratik abendura arte, ikasle bakoitzak bere profila sortuko du MeOrientaren plataforman. Bertan, aurreko ikasturteko emaitza akademikoak, zaletasunak edo ezaugarri pertsonalak jasoko ditu, besteen artean.

Otsailetik aurrera, “One to one” elkarrizketa-saioak egingo dira, ikasturte eta ikasle bakoitzeko bana. Bertan parte hartuko dute MeOrientaren orientatzaileak, familiek seme-alabekin, ikastolako orientatzaileak eta tutoreek. Eta MeOrienta-k jasoko duen informazio hori familiei eta ikasleei emango zaie, tutoreekin eta orientatzailearekin lankidetzan.

MeOrientarekin ikasle bakoitzaren DNA profesionala diseinatzen joango gara. Badakigu inork ezin duela etorkizuna aurreikusi, baina neurtu dezakegu, eta horrek aukera emango digu neska eta mutilen erradiografia izateko eta 1.300 lanbideren DNArekin alderatzeko, ibilbide akademiko estrategikoenak hautatzeko.

“Programak aukera emango digu ikusteko gure ikasleek zein profil duten ikasle gisa eta zein lanbide-profil egokitzen zaien gehien”, aurreratu digu Itziar Urkirik. Gainera, DBHko notak sartuta, sistemak Batxilergoko emaitzak aurreikus ditzake, eta selektibitateko nota hipotetikoa sortzeko aukera ematen du, gehien haztatzen dituzten modalitateko eta batxilergoko ikasgaiak aukeratuz. “Adibidez, bere nota hipotetikoa unibertsitate guztietako mozketa-notekin aldera dezakete, non sartzen diren ikusteko edo aurreinskripzio-zerrendak sortzeko”, zehaztu du Urkirik.

MeOrienta programa txertatuta, EKINTZA Ikastolako ikasle bakoitzaren atzean ezkutatzen den potentziala deskubritzea espero dugu, eta haren ibilbide akademikoan laguntzea, eta, aldi berean, egungo lan-merkatuan dagoen erronka nagusietako bati heltzen laguntzea: talentuaren eta ezagutzaren arteko arrakalari, hain zuzen ere.