Asier Alonso: "Maite duzuna egitea da gakoa, ez enplegu bat bermatuko dizuna"
2025/04/04
EKINTZA Ikastolako etapa amaituta, Asier Alonsok Fisika Teorikoa ikasi zuen eta cum laude doktoretza lortu zuen 2023an. Bere ibilbideak Espainiako, Frantziako, Kanadako eta Estatu Batuetako erreferentziazko unibertsitateetan ikertzera eraman du. Orain, ikerkuntza eta irakaskuntza uztartzen ditu EHUn, dibulgazio zientifikoarekin duen konpromisoa alde batera utzi gabe. Horregatik, ikastolara itzultzen da ahal duenean, belaunaldi berriak inspiratzeko asmoz, azkenekoa Family Expert ekimenaren esparruan orain gutxi. Ekimen honekin, ikasleen eta familien ezagutza gure ikasleei hurbiltzea dugu helburu.
Zerk bultzatu zintuen fisika zure bide profesional gisa hautatzera? Erabaki hori aurreikusi zuen une edo esperientzia zehatzik izan zenuen?
Ez dut uste momentu zehatz bat egon denik nire aukeraketa erabakitzeko. Betidanik, matematikak liluratu nau, eta fisikan horiek aplikatzeko modu bat ikusi nuen, mundua ulertzeko. Gainera, zientzia fikziozko literaturarekiko grina sentitu dut beti, inspirazio iturri handia izan baita niretzat. Horrek piztu zidan, beharbada, zulo beltzak eta kosmologia bezalako gaiekiko interesa, eta, azkenean, fisika ikasteko erabakia hartu nuen. Ikastolan, asko gustatu zitzaizkidan, esaterako, Ignacio, aurreko zuzendariak, emandako matematikako eta fisikako klaseak. Egia esanda, ez dut uste zientzia puruen aldeko giro berezirik egon zenik. Donostian, zortea dugu aurrerako ikerketa zentroekin eta urte osoan zehar hainbat dibulgazio jarduera ditugula, eta Ikastolak horietan parte hartzea gehiago sustatu dezakeela uste dut.
Zure ustez, garrantzitsua da gazteek orientazio akademiko ona izatea?
Bai, nire ustez funtsezkoa da, batez ere karrera bakoitzeko irteera profesionalei buruzko ideia oker edo sinplifikazio asko dabiltzalako. Izan ere, zientzia hutsak kasu berezi bat dira. Dakidanez, nire ikaskide guztiek askotariko bide profesionalak jarraitu dituzte, programazioa eta robotika, espazio-esplorazioa, aholkularitzak, optika eta medikuntza (RFIRen bidez).
Zer esango zenieke ikasteko zer aukeratu zalantzan dutenei?
Esango nieke benetan gustatzen zaien hori egitean zentratzea, ikasten gozatzen duten hori, lana lortzea bermatuko diena uste duten hori baino gehiago. Azken finean, aldaketa azkarren garaian gaude, eta bertan malgutasuna eta ikasketa etengabearen gaitasuna funtsezkoak dira; beraz, motibatuta gauden eta guk betetzen gaituen zerbait egitea da garrantzitsuena.
Orain, ikertzaile eta irakasle gisa EHUra itzultzen ari zarenean, zer erronka eta aukera ikusten dituzu etapa berri honetan?
Niretzat, etapa berri honek egonkortasuna adierazten du, ikerketaren munduan oso ohikoa ez den zerbait. Karrera zientifikoko erronka nagusietako bat prekarietatea da: aldi baterako kontratuak, mugikortasun etengabea eta maila globalean lanpostu kopuru mugatu baten lehia basatia. Orain, lanean hasteko aukera dut, nire garapen profesionalean eta pertsonalean zentratzeko, eta arlo zientifikoan modu sendoagoan laguntzeko.
Hitzaldiak ematen dituzu EKINTZA Ikastolan eta beste gune batzuetan, gazteengan bokazio zientifikoa pizteko. Zergatik uste duzu dela garrantzitsua hori egitea?
Zientzia modu irisgarri eta hurbilean hurbiltzeko nahiak pizten dit EKINTZAra joateko interesa. Erakutsi nahi dut ez dela ezagutza abstraktuen multzo bat bakarrik, mundua ulertzeko eta problema praktikoak ebazteko tresna ahaltsua baizik. Gainera, motibazioa ematen dit ikasleei agian inoiz aintzat hartuko ez zituzten bokazioak aurkitzen laguntzeak. Askotan, haien aukerak karrera tradizionalenetara mugatzen direla dirudi, haien garapen pertsonal eta profesionala susta dezaketen beste bide batzuk esploratu gabe.
Atzera begiratuta, zer aholku emango zenioke 16-17 urteko zure ni-ari, zure etorkizuna erabakitzen ari zinenean?
Erabakiak ez direla hain determinatzaileak diruditen bezainbeste esangoi nioke. Batxilergoan, ikasketaren aukerak eta selektibitateko notak gure etorkizuna definituko dutela sentitzen dugu. Gero, unibertsitatean, hautazko gaiek eta masterrak garrantzitsuak izango direla uste dugu. Hala ere, egia da ibilbide profesionalak ez duela lerro zuzena jarraitzen. Asko ikasketak aldatu egiten dituzte urte batzuen buruan, eta beste batzuk, amaitutakoan, ikasketekin inolako harremanik ez duen zerbait egiteari ekiten diote. Garrantzitsuena ez da une bakoitzean “erabaki egokia” hartzea, baizik eta ikastea, egokitzea eta esperientzia bakoitza baliatzea.
Etorkizunari begira, zein erronka edo helburu jarri dituzu zure ikertzaile eta irakasle ibilbidean?
Nire helburu nagusiak ikerketa maila altua mantentzea eta, aldi berean, ikasleen benetako konpromisoa lortzea dira. Halaber, Grado amaierako lanak (TFG), Master amaierako lanak (TFM) eta tesia zuzendu nahi ditut, ez bakarrik lehiakorrak izan daitezen, baizik eta nire ikerketa arloan balio esanguratsua ere ekar dezaten.
