Familia-ingurunetik eskola-ingurunerako trantsizioa mugarri bat da haur-etapako haurren garapenean. Hemen familiarizazio ospetsua sartzen da jokoan, beharrezkoa eta batzuetan kezkagarria, haurrak hezkuntza-etapa berri batean sartzen direnean igarotzen duten doikuntza- eta familiarizazio-prozesu mailakatu hori. Kasu honetan, lehenengoaz ari gara, hau da, etxetik Haur Hezkuntzako zikloa hasiko den espazio berri batera jauzi egiteaz. Eta erronka handia da gure txikientzat, ingurune, errutina eta pertsona berriekin harremantzen ikastea baitakar. Familiarizazioak alderdi emozionalak, sozialak eta portaerazkoak biltzen ditu. Horrek esan nahi du haurrek beren konfiantzazko helduengandik bereizten ikastea, jarraibideei erantzutea, beste haur batzuekin partekatzea edo jolasten ohitzea.

Jakina, familiarizazioa ez da egun batetik bestera gertatzen; aitzitik, prozesu progresiboa da, eta denbora, pazientzia eta konfiantzazko helduen laguntza eskatzen ditu. Etxetik kanpoko eskola-ordutegi, jarduera eta arauetara egokitzeko lehen ahaleginarekin batera, edo figura ezezagun berriekin loturak eta harremanak ezartzearekin batera, familia-ingurunetik eta zaintzaile nagusietatik bereiztea izan daiteke ikastolara egokitzeko haurrek izaten duten zailtasun handienetako bat.

Prozesu naturala

Guraso garen aldetik, kezka senti dezakegu prozesu horretan, batez ere seme-alabak negarrez edo ingurune berrira zabaltzeko zailtasunarekin ikusten ditugunean. Ez da kezkatzeko arrazoia, gizaki orori dagozkion jarrera naturalak dira, aldaketaren edo berregokitzearen aurrean. Edo helduok ez al dugu, beharbada, egokitzeko denborarik behar lanez edo hiriz aldatzean? Beraz, lasai hartu, gure seme-alabek ikastolako pertsona erreferenteekin lotura berriak sortuko dituztela egiaztatuko dugu eta denborak aurrera egin ahala. Atxikimendu-figura berriek funtsezko zeregina izango dute haien garapenean, eta, kasu batzuetan, urte askoren buruan ikasleek oraindik oroituko dituzte.

2-3 urteko haurren eskola-eremura egokitzea prozesu mailakatua eta naturala da, eta hainbat etapa eskatzen ditu. Lehenik, haurrak ingurune berria, errutinak eta pertsonak ezagutuko eta ditu eta ohitzen joango da. Gero, jardueretan aktiboki esploratzen eta parte hartzen hasiko da, eta, azkenik, erabat egokituko da Ikastolaren ingurune berrira.

Zer egiten dugu EKINTZA Ikastolan familiarizazio egokia errazteko?

Giro atsegina sortzen dugu. Samurtasuna, segurtasuna eta konfiantza transmititzen dituen espazio bat eskaintzen dugu, familiarizazioa errazteko, kolore beroen, dekorazio adiskidetsuen eta jolas-txokoen bidez, esploratzera eta gustura sentitzera gonbidatzen gaituztenak.

Errutina argiak eta aurreikusteko modukoak ezartzen ditugu. Aurreikus daitezkeen ordutegiak, jarduerak eta arauak zehazteak haurra orientatuta senti dadin eta gertatuko dena aurreratu ahal izan dezan laguntzen duelako.

Arreta pertsonalizatua eskaintzen dugu. Gertuko laguntza eskaintzen dugu, haur bakoitzaren behar espezifikoetara, indarguneetara eta ikasteko estiloetara egokituz.

Pixkanakako miaketa sustatzen dugu. Haurrak beren erritmora espazio, material, ikaskide berrietara hurbiltzea ahalbidetzen dugu.

Familiak inplikatzen ditugu. Pertsona erreferenteekin etengabeko elkarrizketari esker, ekintzak koordinatu eta familiarizazio prozesuan izan daitezkeen zailtasunak aurreikus ditzakegu. Funtsezkoa da haurrak bi inguruneen babesa sentitzea. Hemen talde bat gara!

Zer rol jokatzen duzue gurasoek familiarizazio prozesuan?

Laguntza emozionaleko zutabe nagusia zarete, aldaketa- eta egokitze-prozesu honetan zehar zuen seme-alabei segurtasuna, konfiantza eta euspen emozionala emateaz arduratuz. Era berean, funtsezkoa da erreferentziazko pertsonek tutoreekin edo familia-orientatzailearekin elkarrizketa arina izatea eta familiarizazio prozesuan egindako aurrerapenen eta erronken berri izatea. Gomendagarria da, halaber, etxeko errutinak ikastolakoekin lerrokatzea, zuen seme-alaben erosotasun eta orientazio handiagoa izateko.

Gainera, EKINTZA Ikastolatik garrantzi handia ematen diogu euskarari eskolako egokitzapenean eta ibilbidean, eta, horregatik, familiei dei egiten dizuegu, ahal den neurrian, zuen seme-alabak hizkuntzara hurbiltzea etxean. Ulermena hobetzen lagunduko die, aktiboki parte hartzera gonbidatuko ditu eta, azken finean, ingurune berri honetan integratzera.

Familiarizazio arrakastatsu baten onurak

Gure esperientzian oinarrituz zerbait argi badugu, familiarizazio arrakastatsu batek eskolako lehen urteetan garapen eta ikaskuntza osasungarrirako oinarriak ezartzen dituela da. Eragin positiboa du ongizate emozionalean, ikaskuntzan eta trebetasun sozialetan, erraztu egiten baitu haurrek segurtasuna eta erosotasuna sentitzea eta giro berria konfiantzaz esploratzea.

EKINTZA Ikastolan familia berriei bidaia zoragarri honetan laguntzeko irrikitan gaude. Maitasun eta konfiantza handia opa dizuegu etapa berri honi ekiten diozuen guztioi, zuen seme-alabak eta zuen burua hobeto ezagutzeko urrezko aukera baita!