"Gure Batxilergoaren gakoa eskakizun akademikoaren eta ikasle bakoitza pertsona gisa zaintzearen arteko orekan datza"

Batxilergoa etapa erabakigarria da ikasleen bizitzan. Zergatik da hain garrantzitsua une hau eta zer eginkizun du haien etorkizun akademiko eta pertsonalaren eraikuntzan?

Batxilergoa trantsizio-etapa erabakigarria da, une honetan hasten direlako ikasleak benetan beren etorkizun akademikoa eta profesionala modu kontzienteagoan eraikitzen. Ez da soilik ezagutza akademikoak sendotzeko garaia; aldi berean, autonomia pertsonala, erantzukizuna, ahalegina eta erabakiak hartzeko gaitasuna indartzen diren etapa da. EKINTZA Ikastolan uste dugu Batxilergoak etorkizunerako oinarri sendoa eman behar diela ikasleei, bai unibertsitateko ikasketetarako, bai goi-mailako zikloetarako, eta, aldi berean, pertsona bezala hazten lagundu behar diegu.

Batxilergoaren ondoren zer ikasi aukeratzea da ikasleen zalantza nagusietako bat. Nola laguntzen diezue EKINTZA Ikastolan erabaki eta orientazio akademikoko prozesu horretan?

Orientazioa da gure etaparen ardatz nagusietako bat. Bigarren Hezkuntzan hasitako bideari jarraipena emanez, Batxilergoan tutoretzak, orientazio-zerbitzuak eta prestakuntza-saioak areagotu egiten ditugu, ikasle bakoitzak bere interesak, gaitasunak eta trebetasunak hobeto ezagutu ditzan. Gure helburua ez da soilik informazioa ematea, ikasle bakoitzari bere bidea aurkitzen laguntzea baizik. Horregatik, orientazio akademikorako zerbitzuaren laguntzarekin, ikasleek beren etorkizuneko ikasketen arabera diseinatzen dute ibilbidea, erabaki hori ahalik eta segurtasun handienarekin har dezaten.

Modalitate bakoitzaren barruan ibilbide ezberdinak eskaintzen dituzue. Zergatik da garrantzitsua ikasleei malgutasun hori ematea?

Ikasle guztiak ez direlako berdinak, eta etorkizuneko helburuak ere ez direlako berberak. Horregatik, gure ustez funtsezkoa da Batxilergoan malgutasuna eskaintzea. EKINTZA Ikastolan bi modalitate nagusi ditugu: Zientzia eta Teknologia, eta Giza eta Gizarte Zientziak; baina, horien barruan ere, ikasle bakoitzak bere interesen arabera ibilbide propioa osatzeko aukera du. Malgutasun horrek aukera ematen du motibazioa handitzeko, ikasleak bere burua hobeto kokatzeko eta gero egingo dituen ikasketetarako prestaketa egokiagoa izateko.

EKINTZA da Batxilergo Duala eskaintzen duen Donostiako ikastola bakarra. Zer plus ematen die esperientzia horrek ikasleei?

Batxilergo Dualak balio erantsi oso handia ematen die ikasleei. Alde batetik, nazioarteko ikuspegia ematen die, bi titulazio aldi berean lortzeko aukera baitute: hemengoa eta American High School Diploma. Bestetik, ingelesa modu oso naturalean eta maila handian garatzeko aukera eskaintzen die. Baina ez hori bakarrik: autonomia, antolaketa-gaitasuna eta motibazioa ere indartzen ditu. Gainera, Europako curriculumean ohikoak ez diren ikasgaiak egiteko aukera ematen du, adibidez Argazkilaritza, Kriminologia edo Psikologia; eta horrek ikasleen jakin-mina eta interes pertsonalak ere aberasten ditu.

EKINTZA Ikastolako ikasle gehienak unibertsitate-ikasketetara bideratuta daude. USaPak pisu handia du hemen, guztiek gainditzen dute gainera urtez urte. Nola egiten duzue lan egunerokoan une horretara ondo prestatuta iristeko, bai maila akademikoan zein emozionalean?

Gure eguneroko lana prestaketa integralean oinarritzen da. Maila akademikoan, Batxilergoaren antolaketan eta metodologian USaPeko azterketaren baldintzak kontuan hartzen dira, eta horrek aukera ematen die ikasleei proba horretara ohituz joateko. Horrez gain, gure emaitzek erakusten dute prestaketa hori sendoa dela: urtez urte unibertsitatera sartzeko proba egiten duten ikasle guztiek gainditzen dute, eta lortutako notak inguruko ikastetxeen batezbestekoa baino altuagoak izan ohi dira. Maila emozionalean, berriz, tutoretzak eta gertuko jarraipenak garrantzi handia dute; izan ere, etapa bakoitzean hiru tutore izateak ikasle bakoitzaren bilakaera gertutik ezagutzea eta une horretan behar duen laguntza eskaintzea ahalbidetzen du.

Ikasleak ez ezik, pertsonak ere badira. Zure esperientzia zabala oinarri hartuta, zein esango zenuke dela EKINTZA Ikastolaren gakoa etorkizunerako trebatuta eta balioak dituzten pertsonak prestatzeko?

Nik esango nuke gakoa orekan dagoela: exijentzia akademikoa eta pertsonaren zaintza uztartzen jakitean. EKINTZA Ikastolan ez dugu soilik prestakuntza akademiko sendoa eskaintzen; aldi berean, errespetua, autonomia, kontzientzia soziala, erantzukizuna eta ekintzailetza sustatzen ditugu. Gure tutoretza-lanak hiru ardatz ditu: familiarekin batera laguntzea, orientazio profesionala eskaintzea eta inpaktu sozial positiboa duen ekintzailetza bultzatzea. Horregatik, gure helburua ez da ikasle onak soilik prestatzea, baizik eta etorkizunari aurre egiteko gaitasuna eta balioak izango dituzten pertsonak heztea.

Datorren ikasturtean Batxilergoa ikasiko duen seme edo alabarentzat aukerak baloratzen ari diren familiei: zergatik aukeratu EKINTZA Ikastola?

EKINTZA aukeratzeak esan nahi du seme-alabentzat etorkizunerako oinarri sendoa duen Batxilergo bat aukeratzea. Esan nahi du prestakuntza akademiko sendoa izango dutela, orientazio pertsonalizatua jasoko dutela eta gertuko jarraipena izango dutela, bai ikasleek, bai familiek. Gainera, malgutasuna eskaintzen dugu, ikasle bakoitzak bere bidea eraiki dezan; eta, horrekin batera, pertsona moduan hazteko espazioa ere bai. Azken finean, EKINTZA Ikastolan ez dugu soilik hurrengo pausoa prestatzen; ikasleen etorkizuna eraikitzen laguntzen dugu, segurtasunez, balioekin eta ilusioz.