Elkarbizitzak: Euskaraz bizi, loturak indartu eta ingurune natural batean esperientziak partekatu

Elkarbizitzak, ikasleak euskaraz bizitzeko, naturarekin konektatzeko eta eskolako errutinatik kanpo une ahaztezinak partekatzeko pentsatutako esperientziak dira. Eta nola ez, baita lagun berriak sortzeko eta irakasleekin zein ikaskideekin loturak sendotzeko ere.

Testuinguru honetan ere, garrantzi handia ematen diogu euskarari, funtsezkoa iruditzen baizaigu gure haurrek euskara komunikazio eta elkarbizitzarako hizkuntza gisa bizitzea, edozein egoeratan baliagarri dela sentitzea, jarduera akademikoetatik hasi eta aisialdi partekatuko uneetara arte. Era berean, bizikidetza horiei esker, tutoreekiko harremanak sendotzen dira, ohikoa ez den beste testuinguru batean gertatzen baitira, eskolako errutinatik eta diziplinatik urrun, jolas eta motibazio-dinamiken bidez.

Izan ere, Lehen Hezkuntzako 3. eta 5. mailako eta DBHko 1. mailako taldeak beren tutoreekin igaroko dituzte hiru egun baserri edo aterpetxeetan, eta helburu hauek dituzten jardueretan parte hartzen dute:

• Euskara komunikazio bide nagusi den giroan murgiltzea.
• Hizkuntza hau espresatzeko, erlazionatzeko eta ondo pasatzeko ere baliagarria dela ikustea.
• Euskara ikasteak izan ditzakeen zailtasunen aurrean suspertzea.
• Beste era batera bizitzea, denbora, ardurak eta esperientziak partekatuz ikaskideekin eta irakasleekin.
• Naturarekin eta ingurunearekin konektatzea, ingurumenarekiko errespetuzko jarrerak garatuz.

Ikasturte honetan, askotariko lekutan izan dira gure ikasleak: DBHko 1. mailako ikasleak Olloraino joan dira, Lehen Hezkuntzako 3. mailako neska-mutilak Arotz-Eneara, Etxarri-Larraunera, eta Lehen Hezkuntzako 5. mailako ikasleak Arantzara. Oroitzapen politak utzi dizkiguten egun partekatuak izan dira.

EKINTZA Ikastolan, Elkarbizitzak funtsezko jarduera dira, elkarrekin bizitzen ikasteko, pertsona gisa hazteko eta ikasle, familia eta irakasleen artean osatzen dugun komunitatea indartzeko aukera.